Ons is vroegoggend wakker - die mans pak vir hulle proviand vir die boot vir die visvang. So 7:20 vertrek ons kaai toe - ek bestuur om gewoond te raak aan die regterkant bestuur - gelukkig is daar min verkeer en die geheue skop vinnig in.
Ek en Nelia kom terug na ons die mans afgelaai het by die kaai vir hulle dag lange ondervinding. Ons was die wasgoed en ek sit en werk terwyl Nelia haar nuwe Kindle geniet.
Ongeveer 13:00 vertrek ons dorp toe waar ons ronddrentel rondom die kaai en al die interessante winkeltjies beloer. Ek is nou al heel behendig met die regterkant bestuur en nie eers meer benoud om te bestuur nie - gelukkig help die plattelandse atmosfeer om die stress van die verkeerde kant bestuur makliker te maak.
Ons eet 'n ligte middagete en ongeveer 3 uur ry ons winkels toe om die nodige melk en brood te koop. So 4 uur bel die mans en ons kry hulle by die kaai. Hulle het 'n heerlike dag op die see gehad - blykbaar was dit windstil en verskriklik warm. Hulle het klomp visse gevang maar meeste teruggegooi omdat ons nie juis fasiliteite het om dit te stoor of mense het om dit voor te gee nie. John vang 'n groot Grouper en Derick 'n paar Key west Permits.
Die Grouper wat hulle teruggegooi het het seker 'n goeie 30-35kg geweeg .. dit is nou as ek moet skat ...
Die manne is stokflou en na 'n laatmiddag swem in die swembad gaan ons nou 'n vleisie op die kole gooi .. ek is oortuig dat hulle nie baie laat vanaand gaan hou nie .. die son het hulle alleen gevang op die blou see en die oe hang maar laag.
No comments:
Post a Comment